තමා දැන් පාර්ලිමේන්තුව නියෝජනය නොකරන නිසා යළිත් රට භාර ගැනීමට නොහැකි බව හිටපු ජනාධිපති රනිල් වික්රමසිංහ මහතා පැවසුවේය.
ජනාධිපති ජේ.ආර්. ජයවර්ධන මහතාගේ 120 වන ජන්ම සංවත්සරය සැමරීම සඳහා පසුගිය 18 වැනිදා කොළඹ පැවති වැඩසටහනකදී තරුණයින් විසින් හිටපු ජනාධිපතිවරයාගෙන් ප්රශ්න මතු කරන ලද අතර එයට පිළිතුරු දෙමින් හිටපු ජනපතිවරයා මේ බව පැවසුවේය.
“මම පාර්ලිමේන්තුවේ නැති නිසා දැන් මට ජාතිය භාර ගන්න බැහැ. 2022 දී ‘අරගලය’ අතරතුර රට පාලනය කිරීමේ වගකීම කිසිවෙකු භාර නොගත්තේ නම්, ජාතියේ අනාගතය අඳුරු වීමට ඉඩ තිබුණා. රට නැවත ස්ථාවර කළ හැකි බව අපි දැන සිටියා එබැවින්, අපි බියෙන් තොරව වගකීම භාර ගත්තා” 2022 දී ජාතිය නැවත භාර ගැනීමේ තීරණය පිළිබඳ ඔහුගේ අදහස් පිළිබඳ ප්රශ්නයකට පිළිතුරු දෙමින් ඔහු පැවසීය.
මෙම ප්රශ්නයට තව දුරටත් පිළිතුරු දෙමින් වික්රමසිංහ මහතා මෙසේ ද පැවසුවේය.
“තරුණයන් නායකත්වය භාර ගැනීමට සූදානම් විය යුතුයි. Gen Z දේශපාලනය ගැන සිතන්නේ කෙසේදැයි මම දන්නේ නැහැ. මගේ පරම්පරාවේ චින්තන රටාව දැන් රටට උදව් කරන්නේ නැත. ජාතියේ අනාගතය ගැන සිතිය යුත්තේ තරුණ පරම්පරාවයි. ශ්රී ලංකාව වසර කිහිපයකින් නිදහසේ 100 වන වසර සැමරීමට නියමිතයි. එම කාලය තුළ ජාතිය කොතැනද සහ ජාතිය අත්කර ගත යුත්තේ කුමක්ද යන්න නව පරම්පරාවට තීරණය කිරීමට සිදුවනු ඇති.
මෙහි දී රටේ වත්මන් තත්ත්වය, විශේෂයෙන් ආර්ථික තත්ත්වය ගැන ‘ඔබ සිතන්නේ කුමක් ද ? තරුණයෙකු වික්රමසිංහ මහතාගෙන් ප්රශ්න කළේය.
“රට නැවතත් ආර්ථික පසුබෑමකට ලක්ව තිබෙනවා. 2022 සහ 2023 වසරවලදී මිනිසුන්ට තම ඉතුරුම් වියදම් කිරීමට සිදු වුණා. ඔවුන් මෙට්ට යට සඟවා තිබූ මුදල් වියදම් කිරීමට ඔවුන්ට සිදු වුණා. ඔවුන්ගේ ඉතිරිකිරීම් අද නැති වී ගොස් තිබෙනවා. උද්ධමනය වැඩි වී තිබෙනවා. අද ජීවත් වීමට ඔබ නිදා සිටින මෙට්ටය විකිණීමට සිදුවිය හැකියි,” ඔහු වත්මන් තත්ත්වය පිළිබඳ ප්රශ්නයකට පිළිතුරු දෙමින් පැවසීය.
ජේ.ආර්. ජයවර්ධන මහතා සමඟ පැවති සම්බන්ධතාව සහ ඔහුගෙන් ඉගෙන ගත් දේ පිළිබඳව ප්රශ්න කළ විට හිටපු ජනාධිපතිවරයා මෙසේ පැවසුවේය,
“මම අධ්යාපනය ප්රතිසංස්කරණය කිරීම සඳහා ධවල පත්රිකාවක් හඳුන්වා දුන්නා. ජනතා විමුක්ති පෙරමුණ පාසල්වල සහ විශ්ව විද්යාලවල විරෝධතා දියත් කළා. දිවංගත ජනාධිපති ජේආර් මට කතා කරලා කිව්වා ඒ ගැන කිසිවක් කරන්න එපා කියලා. මම ඔහුගෙන් ඇහුවා ඒ ධවල පත්රිකාවෙන් මම මොකද කරන්නේ කියලා. ඊට පස්සේ ජයවර්ධන මහත්තයා කිව්වා මාස තුනකින් ඕනෑම දෙයක් කරන්න පුළුවන් කියලා. ජේආර්ගෙන් ඉවසීම ඉගෙන ගන්න පුළුවන් කියලා. ජනාධිපති වෙනකොට ඔහුට වයස අවුරුදු 70 යි. ඊට පස්සේ ඔබේ අත්දැකීම්වලින් සහ අනිත් අයගේ අත්දැකීම්වලින් ඉගෙන ගන්න ඕනේ. ඒ වගේම කැපවෙන්න ඕනේ. පරාජයක් නැතුව ජයග්රහණය ලබාගන්න බැහැ. ජයග්රහණය සදහටම අල්ලාගෙන ඉන්න බැහැ. දේශපාලනයේදී බලය අතහැරලා විපක්ෂයට යන්න ඕනේ. ජනාධිපති ජයවර්ධනත් කිව්වා කවදා හරි විපක්ෂයට යන්න සූදානම් වෙන්න කියලා. පරාජයත් රස විඳින්න වෙනවා කියලා”.
