ආණ්ඩුක්රම ව්යවස්ථා සංශෝධනයක් මගින් ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාම යාමේ වයස වැඩි කිරීමට රජය ගෙන ඇති යෝජනාවට ශ්රී ලංකා නිදහස් නීතිඥ සංගමය සිය බලවත් විරෝධය පළ කළේය.
පසුගිය දා නිවේදනයක් නිකුත් කරමින් ශ්රී ලංකා නිදහස් නීතිඥ සංගමය සඳහන් කළේ මෙම යෝජනාව මගින් අභියාචනාධිකරණ විනිසුරුවරුන්ගේ විශ්රාම යාමේ වයස 63 සිට 65 දක්වා සහ ශ්රේෂ්ඨාධිකරණ විනිසුරුවරුන්ගේ විශ්රාම යාමේ වයස 65 සිට 67 දක්වා දීර්ඝ කිරීමට අපේක්ෂා කරන බවයි.
උසස් අධිකරණ දෙකෙහි දැනට පුරප්පාඩු අටක් පවතින බවත්, එසේ කිරීමට ව්යවස්ථාපිත බැඳීමක් තිබියදීත් ජනාධිපතිවරයා ඒවා පිරවීමට අපොහොසත් වී ඇති බවත් එම නිවේදනයේ වැඩි දුරටත් සඳහන් වේ.
නඩු ගොඩගැසී ඇති කාලය වැඩි වීම, පුරප්පාඩු පිරවීම සහ අධිකරණ යටිතල පහසුකම් වැඩිදියුණු කිරීම මගින් විසඳිය යුතු බවත්, විනිසුරුවරුන්ගේ සේවා කාලය දීර්ඝ කිරීම යුක්තිය පසිඳලීමේ ප්රමාදයන් විසඳන්නේ නැති බවත් ශ්රී ලංකා නිදහස් නීතිඥ සංගමය වැඩි දුරටත් පැවසීය.
මෙම අසමත් වීම බරපතළ ව්යවස්ථාමය උල්ලංඝනයක් ලෙස සැලකිය හැකි බවත්, එය ජනාධිපතිවරයාට එරෙහිව දෝෂාභියෝග යෝජනාවක් සඳහා පවා පදනම විය හැකි බවත් එම සංවිධානය තවදුරටත් ප්රකාශ කළේය.
එවැනි ක්රියාමාර්ග අධිකරණයේ ස්වාධීනත්වය සම්බන්ධයෙන් බරපතළ ප්රශ්න මතු කළ හැකි බවට ද එම සංවිධානය අනතුරු ඇඟවීය.
මෙම ප්රධාන කරුණු නොසලකා හරිමින් විනිසුරුවරුන්ගේ විශ්රාම යන වයස දීර්ඝ කිරීමට රජය සැලසුම් කිරීම තුළ යම්කිසි යටි අරමුණු ඇති බවට දැඩි සැකයක් මතු කරන බව ද එම නිවේදනයේ වැඩි දුරටත් සඳහන් වේ.
