හිටපු ජනාධිපති රනිල් වික්රමසිංහ මහතාගේ බිරිඳ වන මහාචාර්ය මෛත්රී වික්රමසිංහ මහත්මියට පෙබරවාරි 20 වන දින අපරාධ පරීක්ෂණ දෙපාර්තමේන්තුවේ මූල්ය අපරාධ විමර්ශන අංශය හමුවේ පෙනී සිටින ලෙස සිතාසි නිකුත් කර තිබේ.
අතිරේක සොලිසිටර් ජෙනරාල් දිලීප පීරිස් මහතා අද (18) අධිකරණයට මේ බව දැනුම් දුන්නේය. එහිදී වැඩිදුරටත් කරුණු දක්වමින් අතිරේක සොලිසිටර් ජනරාල් දිලීප පීරිස් සඳහන් කළේ, මෙම විමර්ශනයට අදාළව ප්රකාශයක් ලබා දීම සඳහා හිටපු ජනාධිපතිවරයාගේ බිරිඳ වන මෛත්රී වික්රමසිංහට පෙබරවාරි 20 වන දා අපරාධ පරීක්ෂණ දෙපාර්තමේන්තුවේ මූල්ය අපරාධ විමර්ශන අංශය හමුවේ පෙනී සිටින ලෙස කොල්ලුපිටිය පොලිසිය මාර්ගයෙන් දැනුම් දීමට පියවර ගෙන ඇති බව ය.
එක්සත් රාජධානියේ සංචාරයක් සඳහා රාජ්ය අරමුදල් රුපියල් මිලියන 16.6ක් අවභාවිත කළ බවට චෝදනා එල්ල වී ඇති හිටපු ජනාධිපති රනිල් වික්රමසිංහ මහතාට සහ හිටපු ජනාධිපති ලේකම් සමන් ඒකනායක මහතාට එරෙහිව පවරා ඇති නඩුව අධිකරණයේදී කැඳවූ අවස්ථාවේදී මෙම නිවේදනය නිකුත් කරන ලදී.
දෙවන සැකකරු වන සමන් ඒකනායක මහතා ගොනු කළ ඇප අයදුම්පත සම්බන්ධයෙන් නියෝගය ලබා දීම සඳහා අද අධිකරණය රැස්විය. නියෝගය ලබා දෙමින් මහේස්ත්රාත්වරයා ප්රකාශ කළේ දෙවන සැකකරුගේ පාර්ශවයෙන් අපරාධ චේතනාවක් අධිකරණය නිරීක්ෂණය කළ බවයි.
මෙම නඩුකරය යළි අප්රේල් මස 29 වන දා කැඳවීමට නියම කළ මහේස්ත්රාත්වරයා එදින මෙම කටයුතුවල ප්රගතිය දැනුම් දෙන ලෙස ද නියම කළේ ය.
