ශ්රී ලංකා කණ්ඩායමේ පිතිකරුවන් දැක්වූ අදහාගත නොහැකි දුර්වලතාව හේතුවෙන් පාකිස්තානයේ සත්කාරකත්වයෙන් පැවැත්වෙන තුන්කොන් ක්රිකට් තරගාවලිය යටතේ ශ්රී ලංකා කණ්ඩායම සහභාගිවූ පළමු තරගයෙන්ම සිම්බාබ්වේ කණ්ඩායම හමුවේ ඊයේ (20 දා) ලකුණු 67 ක පරාජයකට මුහුණ දුන්නේය.
රාවල්පිණ්ඩිහි පැවැති මෙම තරගයේදී පළමුව පන්දුවට පහර දුන් සිම්බාබ්වේ කන්ඩායම නියමිත පන්දුවාර 20 අවසනදී කඩුලු 8 ක් දැවී ලබා දුන් ලකුණු 163 ක ඉලක්කය හඹා ගිය ශ්රී ලංකා කණ්ඩායමට පන්දුවාර 20 අවසනදී සියලු දෙනා දැවී රැස් කරගත හැකි වූයේ ලකුණු 95 ක් පමණි.
ශ්රී ලංකා පිල වෙනුවෙන් තරමක් දුරට සාර්ථකත්වයට පැමිණි එකම පිතිකරුවා වූයේ නායක දසුන් ශානක වන අතර ඔහු පන්දු 34 කදී හයේ පහර 2 ක් සහ හතරේ පහර 2 ක් සමගින් ලකුණු 34 ක් රැස් කර ගත්තේය. ඒ හැරුණු කොට ද්විත්ව ඉලක්කම් සංඛ්යාව කරා පැමිණි එකම පිතිකරුවා වූයේ භානුක රාජපක්ෂ වන අතර ඔහුද ලබා ගත්තේ ලකුණු 11 කි.
පළමු පන්දුවාරයේදීම පැතුම් නිස්සංක ලකුණු නොලබා දැවී ගිය අතර එතැන් පටන් පිතිකරුවන්ට ලකුණු රැස් කර ගැනීමට වඩා වඩා ප්රමුඛතාවය ලබාදීමට සිදුවූයේ කඩුලු ආරක්ෂා කර ගැනීිමට විය. රාත්රි කාලයේ ඇති ශීතල සහ පිණි සහිත තත්ත්වය මනාව ප්රෙයෝජනයට ගත් සිම්බාබ්වේ පන්දු යවන්නෝ අසාමාන්ය දෝලනයක් සහිතව ශ්රී ලංකා පිතිකරුවන්ට පීඩනය එල්ල කළේ ඊට නොදෙවැනි පන්දු රැකීමකද නිරත වෙමිනි. එහි ප්රතිඵලයක් ලෙස කඩුලු අතර දිව යෑමේදී කුසල් මෙන්ඩිස් පිටියෙන් ඉවත් වූයේ දුවද්දී දැවී යෑඹ නිසාය.
ශ්රී ලංකා පිතිකරුවන් කෙතරම් අසරණතාවයට පත් වූවේද කිවහොත් පන්දුවාරයකට ලකුණු 8 කට වඩා වැඩි වේගයකින් ලකුණු රැස් කර ගත යුතු තත්ත්වයකදී ඔවුනට අධිවේගී පන්දුවාර 6 හෙවත් පවර් ප්ලේ අවස්ථාවේදී රැස් කිරීමට හැකියාව ලැබුණේ ලකුණු 25 ක් පමණි. ඒ අතරතුර කාලයේදී කඩුලු 2 ක් දවා ගැනීමට ප්රතිවාදී පන්දු යවන්නෝ සමත්වූහ. එය මෙම වසරේදී ශ්රී ලංකා කණ්ඩායම පවර් ප්ලේ අවස්ථාවකදී රැස් කරන ලද අඩුම ලකුණු සංඛ්යාව ලෙසින් සනිටුහන් විය.
ශ්රී ලංකා ඉනිමේ තත්ත්වය එවන් කණගාටුදායක තත්ත්වයක පැවැතෙද්දී පළමුව පන්දුවට පහර දුන් සිම්බාබ්වේ පිල වෙනුවෙන් බ්රයන් බෙනට් (49) සහ නායක සිකන්දර් රාසා (47) දෙදෙනාගේ පිතිහරඹය හේතුවෙන් සිම්බාබ්වේ කන්ඩායමට ලකුණු 162 ක් දක්වා ඉදිරියට යෑමට මං විවර විය. ප්රතිවාදී පිතිකරුවන් හමුවේ සිය පන්දුව අණසක පැතිරූ වනිඳු හසරංග ලකුණු 32 කට කඩුලු 3 ක් දවා ගනිද්දී සිය පළමු විස්සයි-20 ජාත්යන්තර වරම් දිනාගත් එෂාන් මාලිංග ලකුණු 27 කට කඩුලු 2 ක් දවා ගත්තේය.
ශ්රී ලංකා පන්දු යවන්නන් විසින් සිම්බාබ්වේ ඉනිම ක්රියාත්මක වද්දී නිලකුණු පන්දු 42 ක් සනිටුහන් කර ගැනීමට සමත් වුවත් ඉතිරි පන්දු 78 න් ඔවුන් ලකුණු 162 වාර්තා කර ගැනීමට ඔවුහු සමත්වූහ. ඒ අතර එම ප්රතිවාදී පිලේ පිතිකරුවන් විසින් හයේ පහර 11 ක් සහ හතරේ පහර 6 ක් එල්ල කිරීමටද වගබලාගෙන තිබිණ.
සිම්බාබ්වේ පන්දුවාර 20 අවසනදී කඩුලු 8 ට ලකුණු 162 යි – බ්රයන් බෙනට් 49, තඩිවංශේ මරුමානි 10, සිකන්දර් රාසා 47, බ්රෙන්ඩන් ටේලර් 11, රයන් බර්ලි 18, තෂින්ගා මුසේකිිවා 11, වනිඳු හසරංග 32/3, එෂාන් මාලිංග 27/2, දුෂ්මන්ත චමීර 27/1, මහීෂ් තීක්ෂණ 30/1
ශ්රී ලංකාව පන්දුවාර 20 අවසනදී සියලු දෙනා දැවී ලකුණු 95 යි – දසුන් ශානක 34, භානුක රාජපක්ෂ 11, පැතුම් නිස්සංක 00, කුසල් මෙන්ඩිස් 06, කුසල් පෙරේරා 04, කමිඳු මෙන්ඩිස් 09, වනිඳු හසරංග 08, දුෂ්මන්ත චමීර 01, මහීෂ් තීක්ෂණ 08, එෂාන් මාලිංග 01, නුවන් තුෂාර 02*, බ්රැඩ් එවන්ස් 09/3, රිචරඩ් න්ගරාවා 15/2, ටී. මපොසා 17/1, සිකන්දර් රාසා 23/1, ග්රේම් ක්රිමර් 17/1, රයන් බර්ල් 08/1
මූලාශ්රය – ශ්රීලංකා ක්රිකට් නිල
