ඉන්ධන සහනාධාර සඳහා භාණ්ඩාගාරය විසින් වෙන් කරන ලද රුපියල් බිලියන ගණනක මුදල් මහජනතාවට ප්‍රමාණවත් සහන ලබා දෙන්නේ දැයි මඩකලපුව දිස්ත්‍රික් පාර්ලිමේන්තු මන්ත්‍රී ශානක්කියන් රාසමානික්කම් අද (06) පාර්ලිමේන්තුවේ දී ආණ්ඩුවෙන් ප්‍රශ්න කළේය.
ඉන්ධන මිල ඉහළ යාම, ලංකා ඛනිජ තෙල් සංස්ථාවේ ලාභදායීතාවය සහ ජනතාව මුහුණ දෙන මූල්‍ය බර පිළිබඳව කනස්සල්ල පළ කළ මන්ත්‍රීවරයා 2026 අප්‍රේල් සහ ජුනි අතර කාලය තුළ ඛනිජ තෙල් නීතිගත සංස්ථාවට ලබා දුන් රුපියල් බිලියන 41ක සම්පූර්ණ ප්‍රතිලාභ, අඩු කළ ඉන්ධන මිල හරහා පාරිභෝගිකයින්ට ලබා දී ඇත්දැයි ප්‍රශ්න කළේය.
එම කාලය තුළ ඛනිජ තෙල් නීතිගත සංස්ථාව රුපියල් බිලියන 29.2 ක ශුද්ධ ලාභයක් වාර්තා කර ඇති බව පෙන්වා දුන් ඔහු, රාජ්‍ය සංස්ථාවේ මූලික වගකීම ලාභ උත්පාදනය කිරීම ද නැතිනම් මහජනතාවට දැරිය හැකි මිලකට ඉන්ධන සැපයීම ද යන්න ප්‍රශ්න කළේය.
ශ්‍රී ලංකාවේ ඉන්ධන ආනයන පිරිවැයට වඩා අඩුවෙන් අලෙවි කරන බවට නියෝජ්‍ය අමාත්‍ය කෞෂල්‍ය ආරියරත්න කළ ප්‍රකාශයට අභියෝග කළ රාසමානික්කම් මන්ත්‍රීවරයා ඩීසල් ලීටරයකට රුපියල් 307කට සහ පෙට්‍රල් ලීටරයකට රුපියල් 322කට ආනයනය කරන බව පෙන්වා දුන්නේය.
මුදල් අමාත්‍යාංශයේ වසර මැද මූල්‍ය තත්ත්ව වාර්තාව ගැන සඳහන් කරමින් මන්ත්‍රීවරයා පැවසුවේ 2026 ජුනි මාසය අවසන් වන විට භාණ්ඩාගාරය සතුව රුපියල් බිලියන 690.3 ක මුදල් ශේෂයක් තිබූ බවයි.
භාණ්ඩාගාරය සතුව සැලකිය යුතු මුදල් සංචිත තිබියදී ඉන්ධන සඳහා අමතර බදු පනවන්නේ මන්දැයි ඔහු ප්‍රශ්න කළේය.
ජනවාරි මාසයේ සිට වෙන් කරන ලද මුළු ඉන්ධන සහනාධාර, ඛනිජ තෙල් නීතිගත සංස්ථාවට සහ අනෙකුත් ඉන්ධන සමාගම්වලට බෙදා හරින ලද මුදල් ප්‍රමාණය සහ ඉන්ධන සහ විදුලි සහන සඳහා රජයේ මාසික වියදම පිළිබඳ විස්තර ද රාසමානික්කම් ආණ්ඩුවෙන් ඉල්ලා සිටියේය.
ඩීසල් ලීටරයකට රුපියල් 70ක සහනාධාරය 2026 දෙසැම්බර් 31 න් ඔබ්බට පවතින්නේ දැයි ඔහු තවදුරටත් ප්‍රශ්න කළේය.
