මඩකලපුවේ හෝටල් කාමරයක ඇති වූ ගින්නකින් ඇති වූ දුම ආඝ්රාණය කිරීමෙන් අද (27) එකම පවුලේ කුඩා දරුවන් දෙදෙනෙකු මිය ගොස් ඇති බව වාර්තා වේ. මෙසේ මියගොස් ඇත්තේ බදුල්ල ප්රදේශයේ අවුරුදු තුනක පිරිමි ළමයෙකු සහ ඔහුගේ අවුරුදු පහක සහෝදරියයි.
පොලිසියට අනුව මියගිය දරුවන්ගේ මව පිළිකාවක් වැළඳී ඇති බව හඳුනා ගැනීම හේතුවෙන් මඩකලපුව රෝහලේ ප්රතිකාර ලබමින් සිටින අතර මෙම දරුවන් දෙදෙනා තම පියා සමඟ මව බැලීමට මඩකළපුවට පැමිණ තාවකාලිකව හෝටල් කාමරයේ නවාතැන් ගෙන ඇත.
පියා දරුවන් දෙදෙනා කාමරය තුළ තබා දොර අගුළු දමා සාප්පුවට ගොස් ඇති බව පොලිසිය පැවසුවේය.
පියා පිටව ගිය පසු දරුවන් දෙදෙනා ලයිටරයක් සමඟ සෙල්ලම් කරමින් සිටියදී, ඇඳන් දෙකක් තිබූ කාමරයේ මෙට්ට වලින් එකක් හදිසියේම ගිනිගෙන ඇති අතර ගින්නෙන් බියට පත් දරුවන් දෙදෙනා ගින්නෙන් දැවී නොගිය අනෙක් ඇඳ යටට රිංගා සැඟවී සිට ඇත.
හෝටල් කාමරයෙන් දැඩි දුමක් පිටවනු දුටු හෝටල් සේවකයින් සහ අවට පදිංචිකරුවන් වහාම ක්රියාත්මක වී කාමරයේ දොර කඩා දමා ඇති අතර අධික දුම නිසා දරුවන් දෙදෙනා ඇඳ යට සිහිසුන්ව සිටිනු දැක ඇත.
ඔවුන් වහාම රෝහල් ගත කිරීමට පියවර ගත්ත ද, රෝහලට ඇතුළත් කරන විටත් දරුවන් මිය ගොස් ඇති බව පොලිසිය පැවසුවේය.
