මෙවර අයවැයෙන් පළාත් සභා මැතිවරණ පැවැත්වීම සඳහා වෙන් කරන ලද අරමුදල්, දිට්වා සුළි කුණාටුවෙන් සිදු වූ හානියෙන් ගොඩ ඒම සඳහා වැය කර ඇති බවත්, එම නිසා මේ වසරේ පළාත් සභා මැතිවරණ පැවැත්විය නොහැකි බවත් ජනතා විමුක්ති පෙරමුණේ මහලේකම් ටිල්වින් සිල්වා මහතා පැවසීය.
පළාත් සභා මැතිවරණ ක්රමය පිළිබඳ පාර්ලිමේන්තු විශේෂ ක්රියාකාරී කණ්ඩායම සිය අවසන් වාර්තාව ඉදිරිපත් කළහොත් ලබන වසරේ මැතිවරණය පැවැත්වීමට රජය සූදානම් බවත්, මේ සම්බන්ධයෙන් ඉන්දියාවෙන් රජයට කිසිදු පීඩනයක් එල්ල වී නොමැති බව ඔහු සඳහන් කළේය.
පසුගිය දා (23) යාපනයේ අරියාලෙයි හි ජනතා විමුක්ති පෙරමුණේ දිස්ත්රික් කාර්යාලය විවෘත කිරීමෙන් පසු මාධ්ය වෙත ඔහු මෙම ප්රකාශය කළේය.
ජවිපෙ මහ ලේකම්වරයා මෙසේ ද පැවසුවේය, “අපි යාපනයේ නව දිස්ත්රික් කාර්යාලයක් විවෘත කළා. ජාතික ජන බලය සහ ජනතා විමුක්ති පෙරමුණ සඳහා යාපනයේ ජනතාව එක්සත් කිරීමේදී මෙම කාර්යාලය වැදගත් එකක් වෙනවා. අපි බලයට පත්ව වසර දෙකක් සම්පූර්ණ කිරීමට ආසන්න බැවින්, අපි බොහෝ වෙනස්කම් සිදු කර තිබෙනවා. අනාගත සැලසුම් හොඳම ආකාරයෙන් ක්රියාත්මක කර රට දියුණු කරනවා. නැවත කිසිදා ජාතිවාදයට තැනක් ලැබෙන්නේ නැහැ“ ඔහු වැඩි දුරටත් පැවසුවේ.
මේ අවස්ථාවේ දී ජනමාධ්යවේදීන් ජවිපෙ මහ ලේකම්වරයාගෙන් පහත ප්රශ්න විමසුවේය.
ප්රශ්නය – ප්රභාකරන්ගේ දේහය තැන්පත් කර ඇති ස්ථානය තමා දන්නා බව සරත් ෆොන්සේකා සඳහන් කර තිබෙනවා. මේ සම්බන්ධයෙන් රජයේ ස්ථාවරය කුමක්ද?
පිළිතුර – අපි ඒ ගැන කිසිවක් දන්නේ නැහැ. සරත් ෆොන්සේකා රජයේ නියෝජිතයෙක් නොවේ, ඔහු හිටපු හමුදාපතිවරයෙක්. ඔහු වරින් වර එවැනි දේවල් සඳහන් කරනවා. අපට ඒ සඳහා වගකීම භාර ගත නොහැකියි. එබැවින් අපට එය පැහැදිලි කළ නොහැකයි.
ප්රශ්නය – මේ වසරේ පළාත් සභා මැතිවරණය පැවැත්වෙනවාද , ඉන්දියාව මැතිවරණයට යම් පීඩනයක් එල්ල කරනවාද?
පිළිතුර – පළාත් සභා මැතිවරණය සඳහා අයවැයෙන් අරමුදල් වෙන් කර තිබෙනවා. එවැනි තත්වයක් තුළ, දිට්වා සුළි කුණාටුවේ බලපෑමට මුළු රටටම මුහුණ දීමට සිදු වුණා. එම අර්බුදයෙන් ගොඩ ඒමට සහ වින්දිතයින්ට සහන සැලසීමට රුපියල් කෝටි 50,000ක් වෙන් කළා. මැතිවරණ සඳහා වෙන් කළ අරමුදල් සහන සඳහා ද වියදම් කළා. එබැවින්, මේ වසරේ පළාත් සභා මැතිවරණය පැවැත්විය නොහැකයි. පළාත් සභා මැතිවරණ ක්රමයේ නීතිමය ගැටලුවක් තිබෙනවා. හිටපු ජනාධිපති රනිල් වික්රමසිංහ මහතා විසින්ම මෙම ගැටලුව ඇති කළා. පළාත් සභා මැතිවරණය පවත්වන මැතිවරණ ක්රමය අධ්යයනය කිරීම සඳහා විශේෂ පාර්ලිමේන්තු ක්රියාකාරී කමිටුවක් පත් කර තිබෙනවා. පාර්ලිමේන්තු ක්රියාකාරී කමිටුව වාර්තාවක් ඉදිරිපත් කරන්නේ නම්, අර්බුද නොමැති නම්, ලබන වසරේ පළාත් සභා මැතිවරණය පැවැත්විය හැකියි. පළාත් සභා මැතිවරණ ගැටලුව සම්බන්ධයෙන් ඉන්දියාව බලපෑම් කර නැහැ. අපි ඉන්දියාව සමඟ රාජ්ය තාන්ත්රික මට්ටමින් සුහදව කටයුතු කරනවා.
ප්රශ්නය – ඉඩම් නිදහස් කිරීම සම්බන්ධයෙන් ජනාධිපති අනුර කුමාර දිසානායක බලයට පත්වීමට පෙර බොහෝ පොරොන්දු ලබා දුන්නා. නමුත් අදටත් ඒ පොරොන්දුව ඉටු වී නැහැ. උතුරු නැගෙනහිර ජනතාව තම ඉඩම් සඳහා අරගල කරමින් සිටිනවා නේද ?
පිළිතුර – ජනාධිපතිතුමාගේ පොරොන්දුව පරිදි ඉඩම් නිදහස් කිරීමේ පියවර ගෙන තිබෙනවා. දේශපාලන දෘෂ්ටිකෝණයකින් නොබලා, පසුගිය වසර එකහමාරක කාලය තුළ උතුරු හා නැගෙනහිර පළාත්වල හමුදා කඳවුරු බොහොමයක් නිදහස් කර තිබෙනවා. පොදු ඉඩම් සහ මාර්ග නිදහස් කර තිබෙනවා. අතිරික්ත හමුදා කඳවුරු සහ ඉඩම් ඉවත් කිරීම සඳහා අපි අදාළ පාර්ශ්වයන් සමඟ සාකච්ඡා කරමින් සිටිනවා. ජනතාවගේ ඉඩම් අපි නිසැකවම ජනතාවට ලබා දෙනවා. එක් පාර්ශ්වයක් කලබල වී විරෝධතාවල නිරත වෙමින් සිටිනවා. අපි ඒවාට අවධානය යොමු කරන්නේ නැහැ. උතුරේ ජනතාවගේ විශ්වාසය දිනා ගැනීම සඳහා අප දුන් පොරොන්දු ඉටු කරනවා. ජනතාව විසින් නොසලකා හරින ලද අය බොරු චෝදනා එල්ල කරමින් සිටිනවා.
වීරකේසරී පුවත්පත ඇසුරිණි
