පළාත් සභා මැතිවරණය කඩිනමින් පවත්වන බවට රජය දුන් පොරොන්දුව කඩ කර ඇති අතර මේ වසරේ දී පළාත් සභා මැතිවරණය නොපවැත්වෙන බවට කළ ජවිපෙ මහ ලේකම් ටිල්වින් සිල්වා පසුගිය දා යාපනයේ දී කළ ප්රකාශය නුසුදුසු එකක් බව පාර්ලිමේන්තු මන්ත්රී මනෝ ගනේෂන් පැවසුවේය.
ජනාධිපති අනුර කුමාර දිසානායක බලයට පත් වූයේ 2025 දී පළාත් සභා මැතිවරණය පවත්වන බව පවසමින් බව ඔහු තවදුරටත් පැවසීය.
ටිල්වින් සිල්වා පසුගිය 23 වැනිදා යාපනයේ දී කළ ප්රකාශය සම්බන්ධයෙන් සිය පක්ෂයේ ස්ථාවරය පැහැදිලි කරමින් මනෝ ගනේෂන් පැවසුවේ දින නියමයක් නොමැතිව කල් දමා ඇති පළාත් සභා මැතිවරණය කඩිනමින් පවත්වන ලෙස විවිධ පක්ෂ දිගින් දිගටම ඉල්ලා සිටින බවයි.
“ජනතා විමුක්ති පෙරමුණේ මහ ලේකම් ටිල්වින් සිල්වා යාපනයේ දීම ප්රකාශ කර ඇත්තේ මෙම වසරේ පළාත් සභා මැතිවරණය නොපවත්වන බවයි. වසරක් ඇතුළත පළාත් සභා මැතිවරණය පවත්වන බවට දුන් පොරොන්දුව රජය කඩ කර තිබෙනවා. පළාත් සභා මැතිවරණය විමර්ශනය කිරීම සඳහා විශේෂ පාර්ලිමේන්තු ක්රියාකාරී කණ්ඩායමක් පත් කර තිබෙනවා. මමත් එම කණ්ඩායමේ සාමාජිකයෙක්. එහි මැතිවරණය පැවැත්වෙන බවට කිසිදු ඇඟවීමක් නැහැ.
ගෝඨාභය රාජපක්ෂ සහ කබ්රාල් 2022 දී ප්රකාශ කළේ ඩොලර් අර්බුදයක් හෝ රුපියල් අර්බුදයක් නොමැති බවයි. නමුත් අවසානයේ සිදුවූයේ කුමක්දැයි අපි කවුරුත් දන්නවා. වත්මන් අර්බුදයේ දී, පාලක පක්ෂය සහ විපක්ෂයේ පක්ෂ ජාතික මට්ටමින් එක්ව කටයුතු කළ යුතුයි. වත්මන් තත්ත්වය තුළ, රට ආරක්ෂා කිරීම සඳහා ප්රමුඛතාවය ලබා දිය යුතු බව අපි අවධාරණය කරනවා.
අපි අනුර කුමාර දිසානායක ජනාධිපතිතුමන්ගේ රජයේ හවුල්කරුවන් නොව, ශ්රී ලංකා රාජධානියේ හවුල්කරුවන්, එබැවින් 2022 කාල පරිච්ඡේදය නැවත ඇති නොවිය යුතු බව අපි ප්රකාශ කරනවා. මේ අවස්ථාවේදී, අපි විරුද්ධ පක්ෂ සමඟ එක්ව කටයුතු කර රට වෙනුවෙන් කටයුතු කළ යුතුයි” මනෝ ගනේෂන් වැඩි දුරටත් පැවසුවේය.
