වයස අවුරුදු දෙකට අඩු දරුවන් සිටින මව්වරුන් විදේශගත වීම සම්බන්ධයෙන් පවතින නීතිමය හා පරිපාලන ක්රමවේදයන් අනුව කටයුතු කිරීම පිළිබඳව රජයේ අවධානය යොමු වී තිබේ.
පාර්ලිමේන්තු මන්ත්රී නීතීඥ ලක්මාලි හේමචන්ද්ර මෙනෙවියගේ සභාපතිත්වයෙන් පසුගිය දා රැස් වූ ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේදී මේ සම්බන්ධයෙන් සාකච්ඡා කර ඇත.
විශේෂයෙන්ම, වයස අවුරුදු 2ත් 18ත් අතර දරුවන් සිටින මව්වරුන් විදේශගත වීමේ දී, ඔවුන් විදේශගතව සිටින කාලය තුළ දරුවන්ගේ රැකවරණය, ආරක්ෂාව සහ අධ්යාපනය පිළිබඳ විධිමත් සැලැස්මක් සකස් කිරීමේ අවශ්යතාව ද කමිටුව අවධාරණය කර ඇත.
මේ සඳහා ළමා හිමිකම් ප්රවර්ධන නිලධාරීන්ගේ දායකත්වය ලබාගැනීමට නියමිත අතර, විදේශගත වීමට පෙර, විදේශගතව සිටින කාලය තුළ සහ නැවත මෙරටට පැමිණීමෙන් පසු යන අවස්ථා තුනේදීම දරුවන්ගේ ආරක්ෂාව හා පවුල් සුබසාධනය සම්බන්ධයෙන් අවශ්ය මැදිහත්වීම් සිදු කිරීමට නියමිතය.
