ප්රතිජීවක ඖෂධ අනිසි ලෙස භාවිතා කිරීම සහ අධික ලෙස භාවිතා කිරීම ප්රති-ක්ෂුද්ර ජීවී ප්රතිරෝධය (Antimicrobial resistance – AMR) ඇති කරන බව ප්රති-ක්ෂුද්ර ජීවී ප්රතිරෝධය සඳහා වූ ජාතික මධ්යස්ථානයේ (National Centre for Antimicrobial Resistance) වෛද්ය ප්රියන්ත අතපත්තු මහතා පැවසුවේය.
වෛද්ය අතපත්තු වැඩි දුරටත් පෙන්නා දුන්නේ නැවත නැවතත් අනතුරු ඇඟවීම් නොතකා පුළුල්, අධීක්ෂණයකින් තොරව ප්රතිජීවක ඖෂධ භාවිතය දිගටම පවතින බවයි.
වෛද්ය නිර්දේශයකින් තොරව ප්රතිජීවක ඉල්ලා නො සිටින ලෙස රෝගීන්ට අවවාද කළ වෛද්ය අතපත්තු, නිසි අවසරයකින් තොරව ප්රතිජීවක ඖෂධ නිකුත් නොකරන ලෙස ඖෂධවේදීන්ගෙන් ද ඉල්ලා සිටියේය. ප්රතිජීවක ඖෂධ ලබා ගත යුත්තේ රෝගයට නිශ්චිත හේතුව හඳුනා ගැනීමෙන් පසුව නිසි වෛද්ය මඟ පෙන්වීමක් ඇතිව බව ද වෛද්ය අතපත්තු අවධාරණය කළේය.
අනවශ්ය ලෙස හෝ වැරදි මාත්රාවලින් ප්රතිජීවක ගැනීම වැනි අනිසි භාවිතය රෝග කාරක වලට ප්රතිරෝධී වීමට ඉඩ සලසන අතර එමඟින් ප්රතිකාරවල කාර්යක්ෂමතාව අඩු වන බව පැහැදිලි කළ ඔහු 1928 සිට ප්රතිජීවක සිය ගණනක් නිපදවා ඇතත්, අද වන විට ඵලදායීව පවතින්නේ 200කටත් වඩා අඩු ප්රමාණයක් බව ද සඳහන් කළේය.
ප්රති-ක්ෂුද්ර ජීවී ප්රතිරෝධය 2019 දී ගෝලීය වශයෙන් මිලියන 1.27ක මරණ සඳහා දායක වී ඇති බව ඇස්තමේන්තු කර ඇති අතර වර්තමාන ප්රවණතා දිගටම පැවතුනහොත් 2050 වන විට වාර්ෂික ගෝලීය මරණ සංඛ්යාව මිලියන 10 දක්වා ළඟා විය හැකි බව ඇස්තමේන්තු කර ඇති බව ද වෛද්ය අතපත්තු වැඩි දුරටත් පෙන්වා දුන්නේය.
