රට පුරා ඩෙංගු මදුරු මර්දන පියවර ශක්තිමත් කිරීම සඳහා තම සංගමයේ යෝජනා ඇතුළත් විශේෂ වාර්තාවක් රජයේ වෛද්ය නිලධාරීන්ගේ සංගමයේ ලේකම් වෛද්ය බණ්ඩාර වරකාගොඩ මහතා සෞඛ්ය අමාත්යවරයා වෙත පිළිගැන්වීය.
ඒ සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස සහ රජයේ වෛද්ය නිලධාරීන්ගේ සංගමයේ අලුතින් තේරී පත් වූ විධායක කමිටු නියෝජිතයින් අතර සෞඛ්ය අමාත්යාංශයේදී පැවැති විශේෂ සාකච්ඡාවේ දීය.
සාකච්ඡාව අතරතුර, සෞඛ්ය අමාත්යවරයා රජයේ වෛද්ය නිලධාරීන්ගේ සංගමයේ අලුතින් තේරී පත් වූ සභාපති වෛද්ය චන්දික එපිටකඩුව, ලේකම් වෛද්ය බණ්ඩාර වරකාගොඩ සහ විධායක කමිටු සාමාජිකයින්ට ඔවුන්ගේ පත්වීම් පිළිබඳව සුබ පැතුවේය.
ශ්රී ලංකාවේ ජනතාවට උසස් තත්ත්වයේ සහ කාර්යක්ෂම සෞඛ්ය සේවා සැපයීම අරමුණු කරගත් අමාත්යාංශයේ උපායමාර්ගික වැඩසටහන් ක්රියාත්මක කිරීමේදී රජයේ වෛද්ය නිලධාරීන්ගේ සංගමයෙහි අඛණ්ඩ සහයෝගය අපේක්ෂා කරන බව අමාත්යවරයා පැවසුවේය.
වත්මන් ඩෙංගු තත්ත්වය සහ වසංගතය පාලනය කිරීම සඳහා අඛණ්ඩව ගන්නා උත්සාහයන් පිළිබඳව ද සාකච්ඡා පුළුල් ලෙස අවධානය යොමු විය. ඩෙංගු රෝගීන්ට ප්රතිකාර ලබා දීමේදී විශේෂඥ උපදේශකයින්, වෛද්ය නිලධාරීන් සහ හෙද කාර්ය මණ්ඩලය ඇතුළු රටේ සෞඛ්ය සේවා අංශ මුහුණ දෙන අභියෝග දෙපාර්ශ්වය සමාලෝචනය කළහ.
