තමිල්නාඩු මහ ඇමති සී ජෝසප් විජේ අද (27) නවදිල්ලියේදී ඉන්දීය අග්රාමාත්ය නරේන්ද්ර මෝදි හමුවී මේකෙදාටු වේල්ල ගැටලුව, ධීවරයින් අත්අඩංගුවට ගැනීම ඇතුළු ප්රාන්තයට අදාළ කරුණු සාකච්ඡා කළේය.
මෙම මස මුලදී බලයට පත්වීමෙන් පසු තමිල්නාඩු මහ ඇමැතිවරයා දිල්ලි අගනුවරට කළ පළමු නිල සංචාරය මෙය බැවින් මෙම හමුව වැදගත්කමක් උසුලන බව ඉන්දීය මාධ්ය වාර්තා කළේය.
කාවේරි ගඟ හරහා මේකෙදාටු වේල්ල ව්යාපෘතිය සඳහා මුල්ගල් තැබීමේ උත්සවයක් කර්ණාටක ප්රාන්තය විසින් ප්රකාශයට පත් කිරීම සම්බන්ධයෙන් තමිල්නාඩු මහ ඇමතිවරයා බරපතල කනස්සල්ල පළ කළ බවත්, එම පියවර කාවේරි ජල ආරවුල් විනිශ්චය සභාවේ (CWDT) අවසාන තීන්දුවට සහ ශ්රේෂ්ඨාධිකරණයේ තීන්දුවට සම්පූර්ණයෙන්ම පටහැනි බවත් මාධ්ය නිවේදනයක දැක්වේ.
රජයේ උත්සව ආරම්භයේදී ‘තමිල් තායි වාස්තු’ (ආයාචනා ගීතය) ගායනා කිරීමට අවසර දෙන පැහැදිලි නියෝගයක් නිකුත් කරන ලෙස තමිල්නාඩු මහ ඇමතිවරයා මෝදිගෙන් ඉල්ලා සිටියේය.
ශ්රී ලංකා නාවික හමුදාව විසින් අත්අඩංගුවට ගත් තමිල්නාඩු ධීවරයින් සහ ඔවුන්ගේ යාත්රා වහාම නිදහස් කිරීම සඳහා දැඩි පියවර ගන්නා ලෙස විජේ ඉන්දීය අග්රාමාත්යවරයාගෙන් ඉල්ලා සිටියේය.
තමිල්නාඩු තොරතුරු හා මහජන සම්බන්ධතා දෙපාර්තමේන්තුවේ නිවේදනයක දැක්වෙන්නේ විජේ මෝදි වෙත සංදේශයක් ඉදිරිපත් කළ බවයි.
ශ්රී ලංකා නාවික හමුදාව විසින් තමිල්නාඩු ධීවරයින්ට හිරිහැර කිරීම සහ අත්අඩංගුවට ගැනීම පිළිබඳව කනස්සල්ල පළ කළ සංදේශය, ඔවුන් නිදහස් කිරීම සඳහා වහාම ෆෙඩරල් මැදිහත්වීමක් ඉල්ලා සිටි බව ඉන්දීය මාධ්ය වාර්තා කරයි.
මෙම දිල්ලි සංචාරයේදී විජේ ඉන්දීය මුදල් අමාත්ය නිර්මලා සීතාරාමන්, කොංග්රස් නායකයින් වන සෝනියා ගාන්ධි සහ රාහුල් ගාන්ධි සහ ඉන්දීය ජනාධිපතිනි ද්රෞපදී මුර්මු හමුවීමට ද නියමිතය.
ඉන්දීය මාධ්ය වාර්තා ඇසුරිණි
