ශ්රී ලංකා අපනයනකරුවන් සඳහා අපනයන සහයෝගීතාව ශක්තිමත් කිරීමට ශ්රී ලංකා අපනයන සංවර්ධන මණ්ඩලය (EDB) සහ ජර්මනියේ ආනයන ප්රවර්ධන කවුළුව (IPD) අවබෝධතා ගිවිසුමකට අත්සන් තබා ඇත. ශ්රී ලංකාවේ අපනයන අභිමුඛ කුඩා හා මධ්ය පරිමාණ ව්යවසායකයන් සඳහා අපනයන සංවර්ධනය ශක්තිමත් කිරීමට සහ වෙළෙඳපොළ ප්රවේශය වැඩි දියුණු කිරීම සඳහා පවතින දිගුකාලීන හවුල්කාරිත්වය යළි තහවුරු කරමින් මෙම ගිවිසුම අත්සන් කරන ලදී.
මෙම අවබෝධතා ගිවිසුම IPD හි ප්රධානී ආචාර්ය ජූලියා බෙලින්හවුසන්, Federation of Wholesale Foreign Trade and Services (BGA), හි ජාත්යන්තර වෙළෙඳපොළ අධ්යක්ෂ මාකස් ශ්වෙන්කේ, ස්ටෙෆනි වෙබර් මහත්මිය සහ IPD හි අනෙකුත් සම්භාවනීය නියෝජිතයන් ඉදිරියේ අත්සන් කරන ලදී.
මෙහිදී පිළිගැනීමේ කතාව පවත්වමින් අපනයන සංවර්ධන මණ්ඩලයේ සභාපති මංගල විජේසිංහ මහතා අවධාරණය කළේ, 2019 වසරේ සිට ක්රියාත්මක වන මෙම ආයතන දෙක අතර සහයෝගීතාවයේ වැදගත් සන්ධිස්ථානයක් මෙම අත්සන් තැබීම මගින් සනිටුහන් වන බවයි. පසුගිය වසර කිහිපය තුළ, ශ්රී ලංකා අපනයනකරුවන්ට යුරෝපීය වෙළෙඳපොළට ප්රවේශ වීමට සහ ඔවුන්ගේ ජාත්යන්තර තරඟකාරිත්වය වැඩි දියුණු කිරීමට සහාය වීම සඳහා IPD ප්රධාන සංවර්ධන හවුල්කරුවෙකු ලෙස කටයුතු කර ඇත.
රැස්වීම අමතමින් ආචාර්ය ජූලියා බෙලින්හවුසන් පෙන්වා දුන්නේ කුඩා හා මධ්ය පරිමාණ ව්යවසායකයින්ට ජාත්යන්තර වෙළෙඳපොළ අවශ්යතා සපුරාලීමට සහ කල් පවතින වාණිජ සබඳතා ඇති කර ගැනීමට ඉඩ සලසන දිගුකාලීන, තිරසාර හවුල්කාරිත්වයන් ගොඩනැගීමේ වැදගත්කමයි. අපනයන සංවර්ධන මණ්ඩලය සමඟ සහයෝගීතාවය දිගටම පවත්වාගෙන යාමටත්, තාක්ෂණික විශේෂඥතාව, ධාරිතා වර්ධන මුලපිරීම් සහ යුරෝපීය වෙළෙඳපොළ සමඟ ශක්තිමත් සබඳතා හරහා ශ්රී ලංකා අපනයනකරුවන්ට සහාය වීමටත් IPD සතු කැපවීම ඇය මෙහිදී යළි තහවුරු කළාය.
මෙම හවුල්කාරිත්වය විශේෂයෙන්ම ස්වභාවික අමුද්රව්ය (Natural Ingredients) අංශය තුළ සැලකිය යුතු ප්රතිඵල ලබා දී ඇති අතර, එහිදී ශ්රී ලංකාවේ අපනයන අභිමුඛ කුඩා හා මධ්ය පරිමාණ ව්යවසායකයින් ධාරිතා වර්ධන වැඩසටහන්, වෙළෙඳපොළ බුද්ධි තොරතුරු, ගැනුම්කරුවන් සමඟ සබඳතා ඇති කර ගැනීම සහ ජාත්යන්තර වෙළෙඳ ප්රදර්ශන සඳහා සහභාගී වීමෙන් ප්රතිලාභ ලබා ඇත. මෙම මැදිහත්වීම් අපනයන සූදානම වැඩි දියුණු කිරීමට සහ යුරෝපීය ගැනුම්කරුවන් සමඟ තිරසාර ව්යාපාරික සබඳතා ඇති කර ගැනීමට දායක වී ඇත. මීට අමතරව, අපනයන අභිමුඛ කාන්තා ව්යවසායිකාවන් සවිබල ගැන්වීම ද මෙම සහයෝගීතාවයේ ප්රධාන අංගයකි. ඉලක්කගත ආධාරක මුලපිරීම් හරහා, කාන්තා නායකත්වයෙන් යුත් ව්යවසායන් සඳහා ජාත්යන්තර වෙළෙඳාමට සහභාගී වීමට සහ ගෝලීය වෙළෙඳපොළ තුළ ඔවුන්ගේ පැවැත්ම වර්ධනය කර ගැනීමට වැඩි අවස්ථාවන් ලබා දී ඇත.
මෙම අවබෝධතා ගිවිසුම මගින් වෙළෙඳ ප්රවර්ධන සේවා, අපනයනකරුවන් සංවර්ධනය කිරීම, ආයතනික සහ කාර්ය මණ්ඩල ධාරිතා වර්ධනය, ව්යාපාරික ගැලපීම් (business matchmaking) සහ අපනයන අභිමුඛ කාන්තා ව්යවසායකත්වය සංවර්ධනය කිරීම ඇතුළු උපාය මාර්ගික ක්ෂේත්රයන්හි සහයෝගීතාව සඳහා නව රාමුවක් ස්ථාපිත කරයි. මෙම ගිවිසුම යටතේ IPD විසින් තාක්ෂණික විශේෂඥතාව, පුහුණු වැඩසටහන්, උපදේශන සහාය සහ වෙළෙඳපොළ ප්රවේශ පහසුකම් දිගටම ලබා දෙනු ඇති අතර, අපනයන සංවර්ධන මණ්ඩලය විසින් අපනයන අභිමුඛ කුඩා හා මධ්ය පරිමාණ ව්යවසායකයන්ගේ සහභාගීත්වය සඳහා සහාය වීම සහ ඒකාබද්ධ අපනයන සංවර්ධන මුලපිරීම් සම්බන්ධීකරණය කරනු ඇත.
ශ්රී ලංකාවේ අපනයන ක්ෂේත්රය ශක්තිමත් කිරීමට සහ ශ්රී ලංකාව සහ යුරෝපය අතර ආර්ථික සබඳතා තවදුරටත් ගැඹුරු කිරීමට දක්වන අඛණ්ඩ සහයෝගීතාවය වෙනුවෙන් අපනයන සංවර්ධන මණ්ඩලය IPD, BGA සහ සියලුම පාර්ශ්වකරුවන්ට සිය ස්තුතිය පුද කළේය. ශ්රී ලංකාවේ අපනයන අභිමුඛ කුඩා හා මධ්ය පරිමාණ ව්යවසායකයන්ට සහ කාන්තා නායකත්වයෙන් යුත් ව්යවසායන්ට ගෝලීය වෙළෙඳපොළ සහ වටිනාකම් දාමයන් සමඟ සම්බන්ධ වීමට ඇති අවස්ථා තවදුරටත් පුළුල් කිරීම සඳහා මෙම සහයෝගීතාවය මත පදනම්ව කටයුතු කිරීමට අපනයන සංවර්ධන මණ්ඩලය සිය කැපවීම යළි තහවුරු කළේය.
