ශ්‍රී ලංකා යොවුන් ක්‍රීඩිකාවෝ තුන්කොන් ශූරතාව දිනති

පාකිස්තානයේ ෆයිසලාබාද් නුවර ඉක්බාල් ක්‍රීඩාංගණයේදී පැවැති වයස අවුරුදු 19න් පහළ බාලිකා තුන්කොන් විස්සයි-20 ක්‍රිකට් තරගාවලියේ අවසන් මහ තරගයෙන් බංග්ලාදේශ වයස අවුරුදු 19න් පහළ කණ්ඩායම ලකුණු 4කින් පරාජය කළ ශ්‍රී ලංකා යොවුන් ක්‍රීඩිකාවෝ ශූරතාව දිනා ගැනීමට අද (16 දා) පස්වරුවේදී සමත් වූහ.

පළමුව පන්දුවට පහර දුන් ශ්‍රී ලංකා කණ්ඩායම නියමිත පන්දුවාර 20 අවසානයේ කඩුලු 6ක් දැවී ලකුණු 158ක් රැස් කළ අතර, පිළිතුරු ඉනිම ක්‍රීඩා කළ බංග්ලාදේශ කණ්ඩායමට නියමිත පන්දුවාර 20 අවසානයේ කඩුලු 7ක් දැවී ලබාගත හැකි වූයේ ලකුණු 154ක් පමණි. ඒ අනුව අවසන් පන්දුවාරය දක්වාම ජයග්‍රාහකයා තීරණය නොවූ තියුණු සටනකින් පසුව ශ්‍රී ලංකාවට ශූරතාව හිමි විය.

ශ්‍රී ලංකා ඉනිම ගොඩනැඟීමේදී ආරම්භක පිතිකාරිනියක ලෙස කැපී පෙනුණු සංජනා කාවින්දි පන්දු 44කින් ලකුණු 64ක් රැස් කරමින් තරගයේ ප්‍රධානතම පිතිකරණ දායකත්වය ලබා දුන්නාය. හතරේ පහර 7ක් සහ හයේ පහර 2ක් ඇතුළත් වූ ඇගේ ඉනිම ශ්‍රී ලංකාවට සටන්කාමී ලකුණු සංඛ්‍යාවක් කරා යාමට ශක්තිමත් පදනමක් විය.

සංජනා සමඟ ඉනිම ආරම්භ කළ විමෝක්ෂා බාලසූරිය පන්දු 15කින් ලකුණු 23ක් රැස් කළේ හතරේ පහර 5ක් සමඟිනි. එම ආරම්භක සබඳතාව ශ්‍රී ලංකා කණ්ඩායමට වේගවත් ලකුණු රැස් කිරීමක් සඳහා මඟ විවර කළේය.

අනතුරුව නෙත්මි උපේක්ෂා පන්දු 25කින් ලකුණු 22ක් ලබා ගනිමින් ඉනිමට දායක වූ අතර, උමයංගනා පීරිස් නොදැවී ලකුණු 28ක් රැස් කළාය. පන්දු 23කට මුහුණ දුන් ඇගේ ඉනිමට හතරේ පහර 2ක් සහ හයේ පහරක් ඇතුළත් විය. අවසන් පන්දුවාර කිහිපයේදී ලකුණු රැස් කිරීම පවත්වාගෙන යාමට එම දායකත්වය වැදගත් විය. දනෝද්‍යා සෙව්මිණි පන්දු 11කින් ලකුණු 15ක් ලබා ගත්තාය.

බංග්ලාදේශ පන්දු යවන්නියන් අතරින් තිති දාස් අපර්ණා කැපී පෙනුණේ පන්දුවාර 4කදී ලකුණු 15ක් පමණක් ලබා දෙමිනි. ඇය කඩුලු දවා ගැනීමට සමත් නොවූවත්, ශ්‍රී ලංකා පිතිකාරිනියන්ට ලකුණු වේගය ඉහළ නැංවීම සීමා කළාය.

ලකුණු 159ක ඉලක්කයක් හඹා ගිය බංග්ලාදේශ කණ්ඩායමේ ආරම්භය එතරම් සාර්ථක නොවීය. ලකුණු 4ක් වන විට ආරම්භක පිතිකාරිනියන් දෙදෙනාම දැවී ගිය අතර, සිව්වැනි කඩුල්ල ලෙස නිෂිතා අක්ටර් නිෂි දැවී යන විට ලකුණු පුවරුවේ සටහන් වූයේ ලකුණු 88කි.

එහෙත් නායිකා සාදියා ඉස්ලාම් සහ සාදියා අක්ටර් එක්ව ශ්‍රී ලංකා පන්දු යවන්නියන්ට දැඩි පීඩනයක් එල්ල කළහ. සාදියා ඉස්ලාම් පන්දු 35කින් ලකුණු 59ක් රැස් කළේ හතරේ පහර 3ක් සහ හයේ පහර 5ක් සමඟිනි. ඇයගේ ප්‍රහාරාත්මක ඉනිම බංග්ලාදේශ කණ්ඩායමට ජයග්‍රහණය පිළිබඳ බලාපොරොත්තු යළි ඇති කළේය.

සාදියා අක්ටර් ද පන්දු 22කින් ලකුණු 35ක් රැස් කරමින් එම සටනට එක් වූවාය. හතරේ පහරක් සහ හයේ පහර 3ක් ඇතුළත් වූ ඇගේ ඉනිමත් සමඟ බංග්ලාදේශය තරගයේ අවසන් භාගයේදී ජයග්‍රහණය සඳහා දැඩි උත්සාහයක නිරත විය.

කෙසේ වෙතත්, ශ්‍රී ලංකා ක්‍රීඩිකාවෝ තීරණාත්මක අවස්ථාවලදී කඩුලු දවා ගනිමින් ප්‍රතිවාදීන්ගේ ඉදිරි ගමන පාලනය කිරීමට සමත් වූහ. චමුදි ප්‍රබෝධා පන්දුවාර 4කදී ලකුණු 17ක් පමණක් ලබා දෙමින් කඩුලු 2ක් දවා ගැනීම ශ්‍රී ලංකා පන්දු යැවීමේ ඉනිමේ කැපී පෙනෙන දක්ෂතාවක් විය. චමෝදි හේරත් ද ලකුණු 32කට කඩුලු 2ක් දවා ගත් අතර, දනෝද්‍යා සෙව්මිණි ලකුණු 23කට එක් කඩුල්ලක් බිඳ හෙළුවාය.

අවසාන පන්දුවාරය වන විටත් බංග්ලාදේශයට ජයග්‍රහණය සඳහා අවස්ථාවක් පැවති නමුත්, ශ්‍රී ලංකා ක්‍රීඩිකාවෝ සිය පාලනය අත්නොහැරීම හේතුවෙන් ප්‍රතිවාදීන්ගේ ඉනිම ලකුණු 154කට සීමා විය. ඒ අනුව ලකුණු 4ක තියුණු ජයක් සමඟින් ශූරතාව තමන් සතු කර ගැනීමට ශ්‍රී ලංකා වයස අවුරුදු 19න් පහළ බාලිකාවෝ සමත් වූහ.

ශ්‍රී ලංකා වයස අවුරුදු 19න් පහළ බාලිකාවෝ – කඩුලු 6ක් දැවී ලකුණු 158යි (පන්දුවාර 20) – සංජනා කාවින්දි 64, උමයංගනා පීරිස් නොදැවී 28, විමෝක්ෂා බාලසූරිය 23, නෙත්මි උපේක්ෂා 22, දනෝද්‍යා සෙව්මිණි 15, ෆර්ජානා එස්මින් 32/1, නිෂිතා අක්ටර් නිෂි 41/1, ජන්නතුල් ෆර්දවුස් 34/1, අෆ්රින් මිම් 35/1.

බංග්ලාදේශ වයස අවුරුදු 19න් පහළ බාලිකාවෝ – කඩුලු 7ක් දැවී ලකුණු 154යි (පන්දුවාර 20) – සාදියා ඉස්ලාම් 59, නිෂිතා අක්ටර් නිෂි 32, සාදියා අක්ටර් 35, ෆර්ජානා එස්මින් 11, චමුදි ප්‍රබෝධා 17/2, චමෝදි හේරත් 32/2, දනෝද්‍යා සෙව්මිණි 23/1.