යතුරුපැදිකරුවන් තම ආරක්ෂාව සහතික කිරීම සඳහා ප්රමිතිගත, SLS සහතික කළ හිස්වැස්මක් පැළඳීම අනිවාර්ය බව කොළඹ ප්රවාහන අමාත්යාංශ ශ්රවණාගාරයේ ඊයේ (07) පැවති මාධ්ය හමුවකදී අදහස් දක්වමින් ජාතික මාර්ග ආරක්ෂණ කවුන්සිලයේ සභාපති මංජුල කුලරත්න මහතා අවධාරණය කළේය.
යතුරුපැදිකරුවන් අතර මරණ සඳහා ප්රධාන හේතුවක් වන්නේ හිසට සිදුවන මාරාන්තික තුවාල බව ඔහු තවදුරටත් පැවසීය.
ශ්රී ලංකාවේ සෑම වසරකම මාර්ග අනතුරුවලින් පුද්ගලයින් 2,500 කට වැඩි පිරිසක් මිය යන බවත්, මෙම මරණවලින් 1,000 කට වැඩි ප්රමාණයක් යතුරුපැදි අනතුරුවලට සම්බන්ධ බවත් වාර්තා වන බව ඔහු පැවසීය.
මාර්ග අනතුරු අවම කිරීම සහ ආරක්ෂිත රිය පැදවීම ප්රවර්ධනය කිරීම අරමුණු කරගත් පියවර 96කින් සමන්විත වසර දෙකක මාර්ග ආරක්ෂණ ක්රියාකාරී සැලැස්මක් ප්රවාහන, මහාමාර්ග සහ නාගරික සංවර්ධන අමාත්යාංශය විසින් දියත් කර ඇති බව ද ඔහු වැඩි දුරටත් පැවසීය.
ශ්රී ලංකා ප්රමිති ආයතනය, ශ්රී ලංකා පොලිසිය සහ පාරිභෝගික කටයුතු පිළිබඳ අධිකාරිය හිස්වැසුම් ආරක්ෂණ ප්රමිතීන්ට අනුකූල වීම සහතික කිරීම සඳහා ඒකාබද්ධ වැඩසටහනක් ක්රියාත්මක කරන අතර රෙගුලාසි ක්රියාත්මක කිරීම සඳහා වැටලීම් ද සිදු කරන බව ඔහු පැවසීය.
