රාජ්ය බුද්ධි සේවයේ හිටපු අධ්යක්ෂ මේජර් ජෙනරාල් (විශ්රාමික) සුරේෂ් සලේගේ සෞඛ්ය තත්ත්වය වේගයෙන් පිරිහෙමින් පවතින බැවින්, මානුෂීය හේතූන් මත වහාම මැදිහත් වන ලෙස ගෝලීය ශ්රී ලාංකික සංසදය ලිපියක් මගින් ජනාධිපතිවරයාගෙන් ඉල්ලා සිටී.
ජනාධිපතිවරයා වෙත යොමු කරන ලද ලිපියකින්, මේජර් ජෙනරාල් සලේ දිගුකාලීන පරිපාලන රැඳවුම් භාරයේ තබා ගැනීම වෙනුවට විනිවිද පෙනෙන අධිකරණ ක්රියාවලියක් හරහා පරීක්ෂණ කඩිනම් කරන ලෙස සංසදය ඉල්ලා සිටියේය. ඔහුගේ වර්තමාන භාරකාරත්ව තත්ත්වයන් සහ නරක අතට හැරෙන ශාරීරික යහපැවැත්ම කෙරෙහි වහාම අවධානය යොමු කිරීමේ අවශ්යතාවය ද එම සංසදය අවධාරණය කළේය.
ඉහළ පෙළේ හමුදා නිලධාරියෙකු ලෙස මේජර් ජෙනරාල් සලේ සිය ජීවිතයේ දශක ගණනාවක් ශ්රී ලංකාවේ ස්වෛරීභාවය සහ ජාතික ආරක්ෂාව ආරක්ෂා කිරීම සඳහා කැප කර ඇති බව ද එම ලිපියේ වැඩි දුරටත් සඳහන් වේ.
විධිමත් චෝදනාවක් ඉදිරිපත් නොකර කිසිදු පුද්ගලයෙකු දිගු කාලීනව රඳවා තබා නොගත යුතු බව අවධාරණය කරන ගෝලීය ශ්රී ලාංකික සංසදය මේජර් ජෙනරාල් සලේ දැනට ත්රස්තවාදය වැළැක්වීමේ පනත යටතේ රඳවා ගෙන සිටින බවත් රැඳවුම් භාරයේ සිටිය දී ඔහුට කිසියම් අවාසනාවන්ත සිදුවීමක් හෝ සංකූලතාවයක් සිදුවුවහොත්, එවැනි ප්රතිඵලයක වගකීම අනිවාර්යයෙන්ම රැඳවුම් නියෝගය නිකුත් කළ අධිකාරිය ලෙස ජනාධිපති කාර්යාලයට පැවරෙන බවත් ලිපියේ සඳහන් කර ඇත.
මේජර් ජෙනරාල් සලේට ඉහළම මට්ටමේ වෛද්ය ප්රතිකාර සඳහා බාධාවකින් තොරව ප්රවේශය ලැබෙන බවටත් ඔහුගේ පුද්ගලික ආරක්ෂාව සහතික කිරීම සඳහා දැඩි පියවර ගන්නා බවටත් ගෝලීය ශ්රී ලාංකික සංසදය ජනාධිපතිවරයාගෙන් ඉල්ලා සිටී.
