පෞද්ගලික බස් රථ හිමියන් සිය සේවා සියයට 50කින් අඩු කිරීමට තීරණය කර ඇති බැවින් හෙට (08) සිට ශ්රී ලංකාව පුරා මගීන්ට ප්රවාහන බාධාවන්ට මුහුණ දීමට සිදුවිය හැකි බව පෞද්ගලික බස්රථ හිමියන්ගේ සංගමයේ සභාපති ගැමුණු විජේරත්න අනතුරු ඇඟවීය.
බස් ගාස්තු සංශෝධනය සහ ඉන්ධන ආශ්රිත සහන පියවර සඳහා කරන ලද ඉල්ලීම්වලට බලධාරීන් ධනාත්මක ප්රතිචාර දැක්වීමට අපොහොසත් වීමෙන් පසු සිය සංගමය මෙම තීරණය ගත් බව ඔහු වැඩි දුරටත් පැවසුවේය.
මාධ්ය හමුවකදී අදහස් දක්වමින් ගැමුණු විජේරත්න මහතා පැවසුවේ මූල්ය දුෂ්කරතා හේතුවෙන් පෞද්ගලික බස් රථවලින් සියයට 25ක් පමණ දැනටමත් ස්වේච්ඡාවෙන් ධාවනය නතර කර ඇති බවයි.
මෙම සතියේ වෘත්තීය සමිති ක්රියාමාර්ගය තව දුරටත් තීව්රර කරන බවත්, දෛනික ගමන් වාර ගණන අඩු කිරීම සහ අත්යවශ්ය උපරිම පැය මෙහෙයුම් සඳහා සේවා සීමා කරන බව ඔහු පැවසුවේය.
“බස් රථ ප්රධාන වශයෙන් පාසල් සහ කාර්යාල කාර්යබහුල වේලාවන් තුළ ක්රියාත්මක වෙනවා. නමුත් පවතින තත්ත්වය තුළ නියමිත ගමන් වාර කිහිපයක් අවලංගු කිරීමට සිදුවෙනවා. සාමාන්යයෙන් දිනකට ගමන් වාර හතරක් ධාවනය කරන මාර්ගවල බස් රථ ධාවනය ගමන් වාර තුනකට අඩු කිරීමට සිදුවෙනවා. එමඟින් සමස්ත මෙහෙයුම් වියදම සියයට 50ක් අඩුකර ගන්න පුළුවන්. අපේ ගැටලු වලට සහනයක් ලබා දෙන ලෙස නැවත නැවතත් අභියාචනා කළ ද ජාතික ප්රවාහන කොමිසම සහ විෂයභාර අමාත්යවරයා ඒ ගැන කිසිම අවධානයක් යොමු කරන්නේ නැහැ” ගැමුණු විජේරත්න තව දුරටත් පැවසුවේය.
මෙම මාධ්ය හමුවේ දී ඔහු වැඩි දුරටත් පැවසුවේ ජූලි මස මුලදී නියමිත වාර්ෂික බස් ගාස්තු සංශෝධනය ක්රියාත්මක කළ යුතු බවයි.මෙහෙයුම් පිරිවැය ඉහළ යාමෙන් සියයට 20 ත් 25 ත් අතර ගාස්තු වැඩිවීමක් සිදුවිය හැකි බව ඔහු සඳහන් කළේය.
