උතුරු තායිලන්තයේ නගරයක් වන චියැං මායි හි බලධාරීන්, මේ මාසයේ ජනප්රිය සංචාරක ආකර්ෂණයක් ඇති ස්ථානයක් වන Tiger Kingdom Chiang Maiහි කොටි දුසිම් ගණනකගේ මරණ පිළිබඳව විමර්ශනය කරමින් සිටී.
Tiger Kingdom Chiang Mai හි සති දෙකකටත් අඩු කාලයක් තුළ කොටි 70 මිය ගියහ, සංචාරකයින්ට කොටි ස්පර්ශ කර ඔවුන් සමඟ ක්රීඩා කළ හැකි උද්යානයක් ලෙස මෙය සැලකේ.
ප්රාදේශීය පශු සම්පත් දෙපාර්තමේන්තුව පැවසුවේ කොටින්ගේ සාම්පලවල සුනඛ ඩිස්ටෙම්පර් වෛරසය / canine distemper virus පෙන්නුම් කළ බවයි. නමුත් වසංගතය සිදු වූ ආකාරය බලධාරීන් තහවුරු කර නොමැත.
නිලධාරීන් පැවසුවේ ඔවුන් කොටින්ගේ දේහය ආදාහනය කර වළ දැමූ බවයි.
දේශීය මාධ්ය වාර්තා කරන පරිදි Tiger Kingdom Chiang Mai හි ජීවත් වූ කොටි 240කට වැඩි සංඛ්යාවක් අතර ඔවුන් ද සිටියහ.
“ඔවුන් අසනීප වී ඇති බව අපට වැටහෙන විට ප්රමාද වැඩියි,” ජාතික පශු සම්පත් දෙපාර්තමේන්තුවේ අධ්යක්ෂ සොම්චුවාන් රතනමුන්ග්ක්ලනොන් මාධ්යයට පැවසීය. බළලුන් හෝ බල්ලන් වැනි සතුන්ට සාපේක්ෂව කොටින්ගේ අසනීප හඳුනා ගැනීම දුෂ්කර බව ඔහු සඳහන් කළේය.
චියැං මායි හි පළාත් පශු සම්පත් කාර්යාලය පසුගිය සතියේ පැවසුවේ කොටින්ගේ මළකුණුවලින් ලබාගත් සාම්පලවල canine distemper virus මෙන්ම ශ්වසන රෝගයට සම්බන්ධ බැක්ටීරියාවක් ඇති බවට පරීක්ෂා කළ බවයි.
canine distemper virus යනු ධාරකයාගේ ශ්වසන, ආමාශ ආන්ත්රික සහ ස්නායු පද්ධතියට පහර දෙන ඉතා බෝවන රෝගයකි. එය සාමාන්යයෙන් සුනඛයන් අතර දක්නට ලැබුණ ද, එය විශාල බළලුන්ට ද ආසාදනය විය හැකිය.
පළාත් පශු සම්පත් කාර්යාලය මීට පෙර පවසා තිබුණේ මූලික පරීක්ෂණවලින් පෙනී ගියේ කොටින්ට ෆෙලීන් පාර්වෝ වයිරසය ආසාදනය වී ඇති බවයි. සමහර ප්රාදේශීය නිලධාරීන් ද මුලින් සැක කළේ මෙම වසංගතය කොටින්ට පෝෂණය කරන ලද දූෂිත අමු කුකුල් මස් වලින් ඇති වූවක් විය හැකි බවයි.
2004 දී චොන්බුරි පළාතේ කොටි සත්වෝද්යානයක ප්රධාන කුරුළු උණ පැතිරීමට හේතුව අමු කුකුල් මස් බව ද සැක කරන ලදී. එම අවස්ථාවේ දී, ඉන්ෆ්ලුවෙන්සා තවදුරටත් පැතිරීම වැළැක්වීම සඳහා කොටි 150කට ආසන්න සංඛ්යාවක් ඝාතනය කරන ලදී.
Tiger Kingdom Chiang Mai හි සේවය කරන පශු වෛද්යවරුන් හෝ අනෙකුත් කාර්ය මණ්ඩලය කිසිවෙකු සුනඛ ඩිස්ටෙම්පර් වෛරසයෙන් රෝගාතුර වී නොමැති නමුත්, ඔවුන් දින 21ක් නිරීක්ෂණයේ තබා ඇති බව රෝග පාලන දෙපාර්තමේන්තුව සති අන්තයේ ප්රකාශ කළ බව තායි පීබීඑස් වාර්තා කළේය.
සත්ව අයිතිවාසිකම් කණ්ඩායම් පවසන්නේ මෙම සිද්ධිය තායිලන්තයේ විනෝදාස්වාදය සඳහා භාවිතා කරන වහල් කොටින්ගේ දුර්වල ජීවන තත්ත්වය ඉස්මතු කරන බවයි.
වනජීවී මිත්ර පදනම තායිලන්තය නිවේදනයක් නිකුත් කරමින් කියා සිටියේ කොටින්ගේ මරණ “වහල් වනජීවී පහසුකම් බෝවන රෝගවලට ඇති දැඩි අවදානම” හෙළි කළ බවයි.
සංචාරකයින් මෙම ආකර්ෂණීය ස්ථානවලින් “ඈත්ව සිටියේ නම්” “මෙවැනි ඛේදවාචක සිදුවීමට ඇති ඉඩකඩ බෙහෙවින් අඩු වනු ඇත” යනුවෙන් පෙටා ඒෂියා AFP වෙත පැවසීය.
නිලධාරීන් විෂබීජහරණය කිරීමේ කටයුතු සිදු කරන බැවින් Tiger Kingdom Chiang Mai සති දෙකක් තාවකාලිකව වසා දමා ඇත.
බීබීසී ඇසුරිනි
