අද (01) සවස මහර බන්ධනාගාරයේ ඇති වූ නොසන්සුන්තාවයෙන් පසු එක් රැඳවියෙකු මිය ගොස් රැඳවියන් පස් දෙනෙකු තුවාල ලබා ඇති බව බන්ධනාගාර ආරංචි මාර්ග පවසයි.
තුවාලකරුවන් රාගම රෝහලට ඇතුළත් කර ඇති බව ද වාර්තා වේ.
මහර බන්ධනාගාරයේ “නොසන්සුන්තාවක්” හට ගෙන ඇතැයි පොලිස් මාධ්ය ප්රකාශක එෆ්.යූ. වුට්ලර් පවසා ඇති අතර අධිකරණ අමාත්ය හර්ෂණ නානායක්කාර සඳහන් කළේ, “රැඳවියන් පිරිසක් බන්ධනාගාරයේ වහළය මත” සිටින බවට තොරතුරු වාර්තා වී ඇති බව ය.
රැඳවියන් විසින් බන්ධනාගාර ප්රධාන ජේලර්වරයාගේ කාර්යාලයට හා විනය අංශයට ගිනි තබා ඇති අතර ගින්න මැඩපැවැත්වීමට අවශ්ය ක්රියාමාර්ග බන්ධනාගාර පාලනාධිකාරිය විසින් ගෙන ඇත.
රැඳවියන්ගේ සුභසාධනය විමසීමට ඥාතීන් බන්ධනාගාරයට පැමිණි අවස්ථාවේදී මෙම සිද්ධිය ආරම්භ වූ බව වාර්තා වේ. බන්ධනාගාර ආරංචි මාර්ග පැවසුවේ, පසුව රැඳවියන් පිරිසක් බන්ධනාගාරය තුළ සිට ගල් ප්රහාර එල්ල කිරීමට පටන් ගත් බවත්, එය ආතතිය වැඩි කළ බවත්ය.
තත්ත්වය පාලනය කිරීම සඳහා බන්ධනාගාර නිලධාරීන් බන්ධනාගාර දොරටුව අසල වෙඩි තැබූ බව බලධාරීන් පැවසීය. තුවාල ලැබූ රැඳවියන් කිහිප දෙනෙකු රාගම රෝහලට ඇතුළත් කළ අතර, පසුව එක් රැඳවියන් තුවාල ලබා මිය ගොස් ඇත.
බන්ධනාගාරය තුළ සහ ඒ අවට ආරක්ෂාව ශක්තිමත් කර ඇති අතර, පොලිසිය, විශේෂ කාර්ය බලකාය (STF) සහ යුද හමුදා සහ නාවික හමුදාව ආරක්ෂාව සඳහා යොදවා ඇත.
පොලීසිය පැවසුවේ මතුව ඇති තත්ත්වය සොයා බැලීම සඳහා මේ වන විට විශේෂ පොලිස් කණ්ඩායම් කිහිපයක් යොදවා ඇති බවය.
