2027 දී පවුල් 400,000ක් අස්වැසුම සුභසාධන වැඩසටහනෙන් ඉවත් කිරීමට නියමිත බව ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ නියෝජ්ය අමාත්ය වසන්ත පියතිස්ස මහතා සන්ඩේ මෝර්නිං පුවත්පත සමඟ පැවති සම්මුඛ සාකච්ඡාවකදී හෙළි කර ඇත.
2028 අවසන් වන විට අස්වැසුම ප්රතිලාභ සඳහා සුදුසුකම් ලබන්නේ අතිශය දුප්පත් කාණ්ඩයට පමණක් බවත් නියෝජ්ය අමාත්යවරයා වැඩි දුරටත් පැවසුවේය.
මෙම පියවර ශ්රී ලංකාවේ ආර්ථික ප්රකෘතිය සහ ජාත්යන්තර මූල්ය අරමුදලේ (IMF) වැඩසටහන යටතේ ඇති කැපවීම් හා සම්බන්ධ අදියර සැලැස්මක කොටසක් බව ද ඔහු පැවසුවේය. කෙසේ වෙතත්, සමාලෝචන ක්රියාවලිය තවමත් සිදුවෙමින් පවතින බවත්, ප්රතිලාභීන්ගේ අවසන් ලැයිස්තුව තවමත් තහවුරු කර නොමැති බවත් ඔහු ප්රකාශ කළේය.
“අපි දැනට සමාලෝචනයක් පවත්වමින් සිටිනවා. තවත් සතියකින් පමණ අපට නිශ්චිත තත්ත්වය පිළිබඳ අවබෝධයක් ලබා ගන්න පුළවන්. ජාත්යන්තර මූල්ය අරමුදල සමඟ අත්සන් තබන ගිවිසුමේ මුලින් අස්වේසුම වෙතින් ඇතැම් කාණ්ඩ ඉවත් කිරීමට සැලසුම් කර තිබුණත්, එය තරමක් ප්රමාද වී තිබෙනවා. කෙසේ වෙතත්, ගිවිසුමට අනුව දෙසැම්බර් 31 වන විට සැලකිය යුතු කණ්ඩායමක් ඉවත් කිරීමට නියමිතයි,” ඔහු පැවසීය.
ගෘහ ආදායම ඇතුළුව තක්සේරු නිර්ණායක 21ක් භාවිතා කරමින් ප්රතිලාභී වර්ගීකරණයන් තීරණය කළ බවත්, තෝරාගත් කාණ්ඩය තනි කණ්ඩායමක් ලෙස වැඩසටහනෙන් ඉවත් කරන බවත් ඔහු පැවසීය.
