කටුනායක බණ්ඩාරනායක ජාත්යන්තර ගුවන් තොටුපළේ පවතින මගී තදබදයට දිගුකාලීන විසඳුමක් ලෙස, පැරණි පළමු පර්යන්තය (Terminal 1) සම්පූර්ණයෙන් නවීකරණය කිරීමේ රුපියල් බිලියන 15ක ව්යාපෘතියක් රජය විසින් ආරම්භ කර තිබේ.
මෙහි විශේෂත්වය වන්නේ මෙම ව්යාපෘතිය සඳහා විදේශීය ණය ලබා නොගෙන, සම්පූර්ණයෙන්ම දේශීය රාජ්ය ප්රතිපාදන හා අරමුදල් භාවිත කිරීමයි.
වරාය හා සිවිල් ගුවන් සේවා නියෝජ්ය අමාත්ය ජනිත්ස රුවන් කොඩිතුවක්කු ප්රකාශ කරන්නේ, ජපාන ආධාර යටතේ ඉදිවන දෙවැනි පර්යන්තයේ කටයුතු අවසන් වීමට තවත් වසර කිහිපයක් ගතවිය හැකි බැවින්, වර්ධනය වන සංචාරක ඉල්ලුමට කඩිනමින් ප්රතිචාර දැක්වීම සඳහා මෙම පියවර ගත් බවයි.
මගී තදබදය අවම කිරීම සඳහා දැනටමත් පුද්ගලික අංශයේ දායකත්වයෙන් තාවකාලික මණ්ඩපයක් (Marquee) ස්ථාපිත කර ඇති අතර, ඒ හරහා අතිරේක චෙක්-ඉන් කවුන්ටර 14ක් ක්රියාත්මක කර තිබේ. එමගින් දිනකට අමතර ගුවන් යානා වාර 10ත් 20ත් අතර ප්රමාණයක් හැසිරවීමේ හැකියාව ලැබී ඇත.
නවීකරණ සැලැස්ම යටතේ: මගී පිටත්වීමේ ශාලාව පුළුල් කිරීම, ආරක්ෂක හා ආගමන-විගමන පෝලිම් අවම කිරීම, මගී පැමිණීමේ අංශය ප්රතිනිර්මාණය කිරීම, ගමන් මලු හැසිරවීමේ පද්ධති නවීකරණය කිරීම සිදුවේ.
මෙම ව්යාපෘතිය අවසන් වීමෙන් පසු පළමු පර්යන්තයේ වාර්ෂික මගී ධාරිතාව මිලියන 6 සිට (දැනට අසීරුවෙන් වුවද මිලියන 10 දක්වා සිදුකරයි) මිලියන 15 දක්වා ඉහළ යනු ඇති අතර, ශ්රී ලංකාව කලාපීය ගුවන් සේවා කේන්ද්රස්ථානයක් ලෙස තවදුරටත් ශක්තිමත් කිරීමට එය ඉවහල් වනු ඇත.
