මත්තල ජාත්යන්තර ගුවන්තොටුපළ පිහිටා තිබෙන ජෛව විවිධත්ව පරිසරය තුළ ඇතිවන සත්ව උපද්රව පාලනය කිරීමටත්, ගුවන්තොටුපළ සේවා සහ මෙහෙයුම් සුරක්ෂිත කිරීමටත්, මත්තල ගුවන්තොටුපළේ වනජීවී කාර්යාලයක් ස්ථාපිත කිරීමට අවබෝධතා ගිවිසුමක් අත්සන් කිරීම අද (27) වරාය, සිවිල්, ගුවන්සේවා සහ බලශක්ති අමාත්ය අනුර කරුණාතිලක මහතාගේ ප්රධානත්වයෙන් මත්තල ගුවන්තොටුපළ පරිශ්රයේදී සිදු කෙරිණි.
මෙමඅවබෝධතා ගිවිසුම අත්සන් කෙරුණේ ගුවන්තොටුපළ හා ගුවන්සේවා ශ්රී ලංකා සමාගම සහ වනජීවී සංරක්ෂණ දෙපාර්තමේන්තුව අතරය. වරාය සහ සිවිල් ගුවන්සේවා අමාත්යාංශයේ ලේකම්, ගුවන්තොටුපළ හා ගුවන්සේවා සමාගමේ වැඩබලන සභාපති ඩබ්.ඩබ්.එස්.මංගල මහතා ද වනජීවී සංරක්ෂණ දෙපාර්තමේන්තුවේ අධ්යක්ෂ ජනරාල් රංජන් මාරසිංහ මහතා ද අවබෝධතා ගිවිසුම අත්සන් කිරීමට එක්වූහ.
පරිසර අමාත්යය වෛද්ය ධම්මික පටබැඳි මහතා ප්රමුඛ එම අමාත්යාංශයේ පූර්ණ අනුමැතිය සහ සහයෝගීතාවය ද මෙම කාර්යාලය ස්ථාපිත කිරීමට ලබා දී තිබේ.
අමාත්ය අනුර කරුණාතිලක මහතා මෙම අවස්ථාවේදී අදහස් දක්වමින් ජාත්යන්තර සිවිල් ගුවන්සේවා සංවිධානයේ නියමයන්ට අදාළව මත්තල ගුවන්තොටුපළ සම්බන්ධව ඇති පාරිසරික උපද්රව පාලනය හා කළමනාකරණය කරගැනීම නිසි පරිදි සිදු කළ යුතු නිසා මෙම කාර්යාලය ස්ථාපිත කර ක්රියාත්මක වීම ජාත්යන්තර වශයෙන් ද වැදගත් වන බව ප්රකාශ කළේය.
මේ වන විට මත්තල ගුවන්තොටුපළේ සම්පත් උපයෝගී කරගැනීම, ගුවන්තොටුපළ අභ්යන්තර මෙහෙයුම්, ගොඩබිම් මෙහෙයුම් හා සංවර්ධනය කටයුතු සඳහා දේශීය හා විදේශීය ආයෝජකයින්ට ඉල්ලුම් කිරීමට අවස්ථාව ලබා දී තිබෙන අතර, සංචාරක ක්ෂේත්රයට ද දායක වෙමින්, විනිවිදභාවය තුළ ඉතා හොඳ ආයෝජන සමාගමක් තෝරාගැනීමට කටයුතු සිදු කරන අතර, කැබිනට් මණ්ඩලය විසින් එම කටයුතු කමිටුවකට පවරා තිබෙන බව ද අමාත්යවරයා සඳහන් කළේය.
