ඉරාන යුද්ධය ඇමරිකානු ගෝලීය නායකත්වය අවදානමට ලක් කර ඇති බව ඉතාලි ආරක්ෂක අමාත්ය ගයිඩෝ ක්රොසෙටෝ පැවසුවේ න්යෂ්ටික අවි උත්සන්න වීමේ “පිස්සුව” පිළිබඳ බිය පළ කරමිනි.
ඉරානයට එරෙහි ඇමරිකානු ජනාධිපති ඩොනල්ඩ් ට්රම්ප්ගේ ප්රහාරවලට සම්බන්ධ වීමට අකමැති අනෙකුත් නේටෝ සහචරයින් මෙන්, ඉතාලිය ද පසුගිය සතියේ මැදපෙරදිගට යන ගමනේදී සිසිලියේ සිගොනෙල්ලා ගුවන් කඳවුරට ඇමරිකානු හමුදා ගුවන් යානා ගොඩබෑමට අවසර දීම ප්රතික්ෂේප කළේය.
“මෙම යුද්ධය එක්සත් ජනපදය එහි ගෝලීය නායකත්වය අවදානමට ලක් කරනවා” ඔහු සම්මුඛ සාකච්ඡාවකදී පැවසීය.
ට්රම්ප් සමඟ හොඳ සම්බන්ධතාවයක් ඇති ඉතාලි අගමැති ජෝර්ජියා මෙලෝනිගේ සමීප සගයෙකු වන ක්රොසෙටෝ, ගැටුම ඊටත් වඩා නරක අතට හැරෙනු ඇතැයි කනස්සල්ලට පත්ව සිටින බවත්, දෙවන ලෝක යුද්ධයේදී (1945 දී) ජපානයට එක්සත් ජනපදය න්යෂ්ටික බෝම්බ හෙළීම ගැනත් සඳහන් කළේය.
“නිකමට සිතන්න, හිරෝෂිමා සහ නාගසාකි පවා ගැටුමක් අවසන් කිරීමට පිළිගත හැකි මාධ්යයන් බව තීරණය කළේ අප වැනි මිනිසුන්මයි. අවාසනාවකට මෙන්, අප සතුව තවමත් න්යෂ්ටික අවි ඇති අතර, ඒවා නොමැති අය ඒවා අත්පත් කර ගැනීමට උත්සාහ කරනවා. අපි ඉතිහාසයෙන් කිසිවක් ඉගෙන ගෙන නැහැ. මේ අවදානම පිස්සුවක්, අප අත්විඳිමින් සිටින්නේ සෑම ක්රියාවක්ම ඉහළ මට්ටමක ප්රතික්රියාවක් ඇති කරන ගැටුමක්” ඔහු වැඩි දුරටත් පැවසුවේය.
ඉරාන යුද්ධය පිළිබඳව පාර්ලිමේන්තුව ඇමතීමට නියමිත ක්රොසෙටෝ පැවසුවේ ට්රම්ප්ට නිර්භීත උපදේශකයින් සිටිය යුතු බවයි.
“මෙම ජනාධිපති ධුරයේ එක් ගැටලුවක් නම් කිසිවෙකු ලොක්කාට විරුද්ධ වීමට එඩිතර නොවීමයි,” ඔහු පැවසීය.
යුද්ධය පිළිබඳ යුරෝපයේ ස්ථාවරය ගැන ට්රම්ප් කෝපයෙන් සිටින විට, ක්රොසෙටෝ පැවසුවේ පසුගිය සතියේ ඇති වූ තත්වයන් හැර වෙනත් තත්වයන් යටතේ ඉතාලිය එක්සත් ජනපදයට තම කඳවුරු භාවිතා කිරීමට අවසර දී නොමැති බවයි.
යුද්ධයට එරෙහිව දැඩි ස්ථාවරයක් ගැනීමෙන් මෙතෙක් වැළකී සිටි ඉතාලි අගමැති මෙලෝනි, ඉරාන ප්රහාරවලට මුහුණ දෙන ගල්ෆ් ජාතීන්ට සහාය දැක්වීමට සහ ලෝකය ඉහළ යන ඉන්ධන මිල සමඟ පොරබදමින් සිටින විට ඉතාලියේ බලශක්ති සැපයුම් ආරක්ෂා කිරීමට සති අන්තයේ සෞදි අරාබිය, කටාර් සහ එක්සත් අරාබි එමීර් රාජ්යයේ සංචාරය කළාය.
මූලාශ්රය: රොයිටර්
