මෙට්‍රෝ බස් සේවාව භාවිත කරන මගී ජනතාවට වඩාත් පහසු, විශ්වාසනීය සහ කාර්යක්ෂම ඩිජිටල් සේවාවක් ලබාදීමේ අරමුණින් LMT Go ජංගම දුරකථන යෙදුමේ පවතින අඩුපාඩු හඳුනාගැනීම සහ එය තවදුරටත් වැඩිදියුණු කිරීම පිළිබඳ විශේෂ සාකච්ඡාවක් ඊයේ (04) පවත්වා ඇත.
ප්‍රවාහන හා මහාමාර්ග නියෝජ්‍ය අමාත්‍ය වෛද්‍ය ප්‍රසන්න ගුණසේන මහතාගේ ප්‍රධානත්වයෙන්, ප්‍රවාහන, මහාමාර්ග සහ නාගරික සංවර්ධන අමාත්‍යාංශයේදී මෙම සාකච්ඡාව පැවැත්විණි.
මෙහි විශේෂත්වය වූයේ LMT Go යෙදුම සැබවින්ම භාවිත කරන මගීන්ගේ අත්දැකීම්, ඔවුන් මුහුණ දෙන ප්‍රායෝගික ගැටලු සහ යෝජනා සෘජුවම සාකච්ඡාවට ලක් කිරීම බව නියෝජ්‍ය අමාත්‍යවරයා පැවසුවේය.
එමෙන්ම මෙට්‍රෝ බස් මෙහෙයුම් කාර්ය මණ්ඩලයේ අත්දැකීම් සහ තාක්ෂණික සේවා සපයන ආයතනවල විශේෂඥ අදහස් ද සැලකිල්ලට ගනිමින්, යෙදුමේ පවතින දුර්වලතා මඟහරවා ගැනීමටත්, මගී අවශ්‍යතාවලට වඩාත් හොඳින් ප්‍රතිචාර දක්වන ආකාරයට එහි පහසුකම් වැඩිදියුණු කිරීමටත් අවධානය යොමු කර ඇත.
බස් රථ 10කින් සහ මාර්ග දෙකකින් නියමු ව්‍යාපෘතියක් ලෙස ආරම්භ වූ මෙට්‍රෝ බස් සේවාව මේ වනවිට බස්නාහිර පළාතේ දිස්ත්‍රික්ක තුනක් ආවරණය කරමින් මාර්ග 7ක බස් රථ 122ක් දක්වා ව්‍යාප්ත වී ඇති බව ද නියෝජ්‍ය අමාත්‍යවරයා පැවසුවේය.
2027 වසරේදී තවත් නව බස් රථ 50ක් සේවාවට එක් කිරීමටත්, ඉදිරියේදී මහනුවර, යාපනය සහ ගාල්ල යන නගර වෙතද මෙට්‍රෝ බස් සේවාව ව්‍යාප්ත කිරීමටත් සැලසුම් කර ඇති බව ද නියෝජ්‍ය අමාත්‍යවරයා හෙළි කළේය.
“පොදු ප්‍රවාහනයේ සැබෑ දියුණුව යනු බස් රථ සංඛ්‍යාව වැඩි කිරීම පමණක් නොව, මගියාට ලැබෙන සේවාවේ ගුණාත්මකභාවයද ඉහළ නැංවීමයි. ඒ වෙනුවෙන් මගීන්ගේ අදහස්වලට සවන් දෙමින්, තාක්ෂණය සහ ප්‍රායෝගික අත්දැකීම් එක් කරගත් වඩාත් ජනතා හිතකාමී පොදු ප්‍රවාහන සේවාවක් ගොඩනැංවීම මෙම වැඩපිළිවෙළේ අරමුණයි” අමාත්‍යවරයා පැවසුවේය.
